ஒரே சார்ஜில் 200 கி.மீ பயணம் மேற்கொள்ளும் மோட்டார் சைக்கிள் அறிமுகம்!

ஏப்ரல் 15, 2019 1117

புதுடெல்லி (15 ஏப் 2019): லைட்னிங் மோட்டார்சைக்கிள்ஸ் நிறுவனம் ஒருமுறை சார்ஜ் செய்தால் அதிகபட்சம் 200 கிலோமீட்டர் வரை செல்லும் புதிய பேட்டரி மோட்டார்சைக்கிளை அறிமுகம் செய்துள்ளது.

பேட்டரி வாகனங்கள் என்றாலே மெதுவாகச் செல்லும் என்ற தத்துவத்தை உடைத்து சூப்பர் மோட்டார்சைக்கிளை உருவாக்கியுள்ளது. லைட்னிங் என்ற பெயரில் வந்துள்ள இந்த பேட்டரி மோட்டார்சைக்கிள் வழக்கமான பெட்ரோலில் இயங்கும் சூப்பர் பைக்குகளைப் போன்ற தோற்றத்தை கொண்டிருக்கிறது.

அதேபோன்று செயல்பாட்டிலும் பெட்ரோல் வாகனங்களுக்கு இணையாக இருக்கும் வகையில் இது வடிவமைக்கப்பட்டுள்ளது. இதன் விலை ரூ.9 லட்சம் என நிர்ணயம் செய்யப்பட்டுள்ளது. இதன் கார்பன் எடிஷன் மாடல் விலை ரூ.13.8 லட்சம் என நிர்ணயம் செய்யப்பட்டுள்ளது.

பிரீமியம் ஸ்போர்ட்ஸ் பைக்குகளுக்கு உரித்தான அனைத்து சிறப்பம்சங்களும் இதில் வழங்கப்பட்டுள்ளன. ஏரோ டைனமிக் வடிவமே சீறிப் பாய்வதை உறுதி செய்வதாக உள்ளது. இதில் லிக்விட் கூல்டு ஏ.சி. இன்டக்‌ஷன் மோட்டார் உள்ளது. இது 90 பி.ஹெச்.பி. திறனும் 244 என்.எம். டார்க் செயல்திறன் கொண்டிருக்கிறது. இதன் கார்பன் எடிஷன் மாடல் 120 பி.ஹெச்.பி. பவர், 244 என்.எம். டார்க் செயல்திறன் வழங்குகிறது.

ஸ்டாண்டர்டு மாடல் மணிக்கு அதிகபட்சம் 217 கி.மீ. வேகத்திலும், கார்பன் எடிஷன் மாடல் மணிக்கு 241 கி.மீ வேகத்திலும் சீறிப் பாயும் என தெரிவிக்கப்பட்டுள்ளது. இந்த மோட்டார் சைக்கிளில் 3 வெவ்வேறு அளவுகளிலான பேட்டரிகள் பயன்படுத்தப்படுகின்றன. 10 கிலோவாட், 15 கிலோவாட், 20 கிலோவாட் பேட்டரிகள் இதில் உள்ளன.

இதில் 10 கிலோவாட் பேட்டரி வாகனத்தை ஒரு முறை சார்ஜ் செய்தால் 113 கி.மீ. தூரம் வரை செல்லும். 15 கிலோவாட் பேட்டரியை பயன்படுத்தினால் அது 169 கி.மீ. முதல் 241 கி.மீ. தூரம் வரை சென்றுள்ளது. 20 கிலோவாட் பேட்டரி 241 கி.மீ முதல் 322 கி.மீ. தூரம் வரை பயணித்துள்ளது.

இந்த மோட்டார்சைக்கிளில் வழங்கப்பட்டிருக்கும் மோட்டார் மணிக்கு 160 கி.மீ. வேகத்தை 20 வினாடிகளில் எட்டும் என தெரிவிக்கப்பட்டுள்ளது. கார்பன் எடிஷனில் ஓஹ்லின்ஸ் சஸ்பென்ஷன் வழங்கப்பட்டுள்ளது. அதேபோன்று பிரெம்போ பிரேக்குகள் பயன்படுத்தப்பட்டுள்ளன. இதில் ஜி.பி.எஸ். அடிப்படையிலான லாகிங் வசதி உள்ளது.

தற்போது அமெரிக்காவில் மட்டுமே அறிமுகம் செய்யப்பட்டுள்ள இந்த ஸ்போர்ட்ஸ் பேட்டரி பைக் விரைவிலேயே இந்தியாவிலும் அறிமுகமாக இருக்கிறது.

தற்போது வாசிக்கப்படுபவை!

செய்தியைத் தேட...