வாட்ஸ் அப் வதந்தியால் மன உளைச்சளுக்கு ஆளான புதுமண தம்பதி!

பிப்ரவரி 11, 2019 595

கன்னூர் (11 பிப் 2019): வாட்ஸ் அப் வதந்தியால் புதுமண தம்பதிகள் மன உளைச்சளுக்கு ஆளாகியுள்ளனர்.

கேரளாவில் பத்திரிக்கை ஒன்றில் திருமண வாழ்த்து பகுதியில் ஒரு தம்பதியின் புகைப்படம் வெளியானது. மணப்பெண் ஜூபி ஜோசப், செம்பந்தொட்டியை சேர்ந்தவர். மணமகன் அனூப் செபஸ்டின், செருபுழாவை சேர்ந்தவர். இருவருக்கும் கடந்த 4ம் தேதி திருமணம் நடந்தது. இந்த திருமணம் பெற்றோர்கள் ஏற்பாடு செய்து நடந்துள்ளது. இந்த புகைப்படத்தில் மணமகனை விட மணமகள் மிக குண்டாக இருந்ததுடன், சற்று வயதான தோற்றத்தில் தெரிகிறார். இதனையடுத்து இவர்களது புகைப்படத்துடன் வாட்ஸ்அப்பில் ஒரு செய்தி உலா வரத்தொடங்கியது. ஜூபி ஜோசப்பிற்கு 48 வயதாகிறது, இதனால் மாப்பிள்ளைக்கு 101 சவரன் நகை, ரூ.50 லட்சம் வரதட்சணையாக கொடுக்கப்பட்டுள்ளது. மேலும், மணப்பெண்ணுக்கு ரூ.25 கோடி மதிப்பு சொத்துகள் உள்ளது. வரதட்சணை மற்றும் சொத்து காரணமாக தான் தன்னைவிட வயதில் மூத்த பெண்ணை 25 வயது வாலிபரான அனூப் திருமணம் செய்து கொண்டார் என வாட்ஸ்அப்பில் செய்தி பரவ தொடங்கியது.

கடைசியாக இந்த பார்வர்டு செய்தி மணமக்களின் வாட்ஸ்அப்பிற்கும் வந்தது. மகிழ்ச்சியில் இருந்த புதுமண தம்பதியர் இந்த செய்தியால் மிகுந்த மனஉளைச்சலுக்கு ஆளாகினார்கள். உறவினர்களும் நண்பர்களும் இது குறித்து தொலைபேசியில் விசாரிக்க புதுமண தம்பதி நொந்துபோயினர். பின்னர் இதுகுறித்து போலீசில் புகார் செய்துள்ளனர். உண்மையில் மணப்பெண் ஜூபிக்கு 27 வயது மற்றும் மணமகன் அனூப்பிற்கு 29 வயதாகிறது. அனூப் சண்டிகரிலும், ஜூபி ஷார்ஜாவிலும் வேலை செய்கின்றனர். அவர்களுக்கு இடையே பெரிய அளவிலான வயது வித்தியாசம் இல்லை. இருவரும் விருப்பப்பட்டுத்தான் திருமணத்திற்கு சம்மதித்துள்ளனர். ஆனால் அடையாளம் தெரியாத யாரோ ஒருவர் பரப்பிய வதந்தி வாட்ஸ்அப்பில் வைரலாக பரவியுள்ளது. அந்த நபரை கண்டறிந்து சட்டத்தின் முன் நிறுத்த வேண்டும் என தம்பதியர் தெரிவித்துள்ளனர்.‘இனியாவது வாட்ஸ்அப்செய்திகளை அப்படியே பார்வர்டு செய்யாமல், அதன் உண்மைத்தன்மை பற்றி சிந்திப்போம். அது தெரியாவிட்டால், குறைந்தபட்சம் மற்ற குரூப்களுக்கு பார்வர்டு செய்வதை நிறுத்தலாம்’ என்று சமூக ஆர்வலர்கள் தெரிவித்தனர்.

நம்முடைய அன்றாட நிகழ்வுகளில் வாட்ஸ் அப், பேஸ்புக் உள்ளிட்ட சமூக வலைதளங்கள் மிக முக்கிய இடத்தை பெற்று விட்டன. நவீன தொழில்நுட்பங்கள் மூலமாக பல நன்மைகளை நாம் பெற்றாலும் அவற்றால் சில தீமைகளையும் அனுபவிக்க வேண்டியது கட்டாயமாகி விட்டது.யார் அனுப்பினார்கள்? என்ன செய்தி? இது உண்மையானதா? பொய்யானதா? என ஆராய்ந்து அறிவதற்கு பொறுமையோ. நிதானமோ இன்றி மற்றொருவருக்கு அந்த செய்தியை உடனடியாக பலர் பகிருவதுதான் இதற்கு முக்கிய காரணமாகும். ஒரு தவறான செய்தியை கூட அவற்றின் உண்மைத்தன்மையை அறிய முடியாமல் அப்படியே நம்பும் நிலைக்கு தள்ளப்பட்டு விட்டோம். இதனால் வதந்தி பரப்புவோர்களின் எண்ணிக்கையும் நாளுக்கு நாள் அதிகரித்து வருகிறமை வேதனிக்குரியது.

தற்போது வாசிக்கப்படுபவை!

செய்தியைத் தேட...