புதுடெல்லி (27 ஜூலை 2022): செவ்வாயன்று டெல்லி காவல்துறையால் கைது செய்யப்பட்ட நிலையில், காங்கிரஸ் தலைவர் ராகுல் காந்தி, மத்திய பாஜக அரசாங்கத்தைப் பற்றி குறிப்பிடுகையில், இந்த சர்வாதிகாரத்திற்கு உண்மைதான் முடிவு கட்டும் என்றார்.
இதுகுறித்து அவர் வெளியிட்டுள்ள ட்வீட்டர் பதிவில் “சர்வாதிகாரத்தைப் பாருங்கள், அமைதியான ஆர்ப்பாட்டங்கள் நடத்த முடியாது, பணவீக்கம் மற்றும் வேலையில்லாத் திண்டாட்டம் குறித்து விவாதிக்க முடியாது. காவல்துறை மற்றும் ஏஜென்சிகளை தவறாகப் பயன்படுத்துவதன் மூலம், எங்களை கைது செய்தாலும், உங்களால் ஒருபோதும் எங்களை வாயடைக்க முடியாது. ‘உண்மை’ மட்டுமே இந்த சர்வாதிகாரத்தை முடிவுக்குக் கொண்டுவரும்” என்று ராகுல் தெரிவித்துள்ளார்
முன்னாள் காங்கிரஸ் தலைவர் டெல்லி காவல்துறையினரால் கைது செய்யப்பட்டு, மற்ற நாடாளுமன்ற உறுப்பினர்களுடன் பேருந்தில் தெரியாத இடத்திற்கு அழைத்துச் செல்லப்பட்டார்.
காங்கிரஸ் இடைக்காலத் தலைவர் சோனியா காந்தியிடம் அமலாக்க இயக்குநரகம் கேள்வி எழுப்பியதையடுத்தும், விலைவாசி உயர்வு போன்ற முக்கியப் பிரச்னைகள் குறித்து நாடாளுமன்றத்தில் விவாதிக்காததாலும் காங்கிரஸ் எம்.பி.க்கள் நாடாளுமன்ற வளாகத்தில் இருந்து ராஷ்டிரபதி பவனுக்கு ஊர்வலமாக சென்றனர்.
இருப்பினும், அவர்கள் ஜனாதிபதி திரௌபதி முர்முவுக்கு ஒரு குறிப்பாணை கொடுக்க முன்னோக்கி நகர்ந்தபோது, டெல்லி போலீசார் அவர்களை விஜய் சவுக் அருகே நடுவழியில் தடுத்து நிறுத்தி கைது செய்தனர்.
