இந்நேரம்.காம்

"ஐக்கிய நாடுகள் சபையின் அமைதிப்படையில் இலங்கை போர் குற்றவாளியான சவேந்திர சில்வா நியமிக்கப்பட்டிருப்பதை நிராகரிக்க வேண்டும்" ஐ.நா பொதுச் செயலர் பான் கீ மூனிடம் அமெரிக்க மனித உரிமை அமைப்புகள் கோரிக்கை விடுத்துள்ளன.

இது தொடர்பாக அமெரிக்காவை மையமாக கொண்டு இயங்கும் மனித உரிமை அமைப்புகள் விடுத்துள்ள கோரிக்கையில் தெரிவிக்கப்பட்டுள்ளதாவது:

"விடுதலைப் புலிகளுக்கு எதிரான போரில், கணக்கில்லாத பொதுமக்கள் கொல்லப்பட்ட மற்றும் பாதிக்கப்பட்ட, அனைத்துலக மனிதஉரிமை மற்றும் மனிதாபிமானச் சட்டங்கள் தொடர்பான அடிப்படைக் கொள்கைகள் மீறப்பட்டதில் மேஜர் ஜெனரல் சவேந்திர சில்வா முக்கிய பாத்திரம் வகித்தவர் என்று குறிப்பிடப்பட்டுள்ளது.

மனிதாபிமான நடவடிக்கை என்று சிறிலங்கா அரசாங்கம் இதனைக் கூறியுள்ள போதும், ஐ.நா நிபுணர்கள் குழுவின் அறிக்கையில் இந்தப்போரில் போர்க்குற்றங்களும் மனிதகுலத்துக்கு எதிரான குற்றங்களும் இடம்பெற்றுள்ளதற்கான நம்பகமான சாட்சியங்கள் இருப்பதாக கூறப்பட்டுள்ளது.

ஐ.நா பொதுச்செயலரிடம் கையளிக்கப்பட்ட இந்த அறிக்கையில் சவேந்திர சில்வா தலைமை தாங்கிய 58 வது டிவிசன் இந்தக் குற்றச்சாட்டுகளில் சம்பந்தப்பட்டதாக விவாதிக்கப்பட்டுள்ளது.

ஐ.நா அமைதி காக்கும் நடவடிக்கைகளுக்கான சிறப்பு ஆலோசனைக்குழுவுக்கு நியமிக்கப்படும் ஒருவரது தலைமைத்துவ ஆற்றலும், குற்றச்சாட்டுகளற்ற அப்பழுக்கற்ற தன்மையும் தகைமைகளாக கருதப்பட வேண்டும்.

சவேந்திர சில்வாவுக்கு எதிரான குற்றச்சாட்டுகள் உறுதிப்படுத்தப்பட்டால், சிறப்பு ஆலோசனைக் குழுவுக்கான அவரது நியமனம் உலகத்துக்கு திகைப்பூட்டும் செய்தியாக அமையும்.

எனவே ஐ.நா பொதுசெயலர் பான் கீ மூன், சவேந்திர சில்வாவின் இந்த நியமனத்தை நிராகரிக்க வேண்டும் அல்லது அவரது நியமனத்தை விலக்கிக் கொள்ள வேண்டும்."

மேற்கண்டவாறு அந்தக் கோரிக்கையில் தெரிவிக்கப்பட்டுள்ளது.

மேஜர் ஜெனரல் சவேந்திர சில்வாவுக்கு எதிராக அமெரிக்காவிலுள்ள நியூயார்க் மாவட்ட நீதிமன்றத்தில் போர்க்குற்ற வழக்கு நிலுவையில் உள்ளது குறிப்பிடத்தக்கது.