ஆளுநர் பன்வாரிலால் புரோஹித் ராஜினாமா?

April 19, 2018

சென்னை (19 ஏப் 2018): பாலியல் சர்ச்சையில் சிக்கியுள்ள தமிழக ஆளுநர் பன்வாரிலால் புரோஹித் இடமாற்றம் அல்லது ராஜினாமா செய்யக் கூடும் என தகவல்கள் தெரிவிக்கின்றன.

பேராசிரியை நிர்மலா தேவி மாணவிகளை பாலியல் ரீதியாக இணங்க வலியுறுத்திய ஆடியோவில் ஆளுநர் பெயரும் அடிபடுகிறது. இதனால் ஆளுநர் பன்வாரிலால் புரோஹித்துக்கு கடும் நெருக்கடி ஏற்பட்டுள்ளது. இதற்கிடையே திமுக உள்ளிட்ட எதிர் கட்சிகள் ஆளுநரை திரும்பப் பெற வேண்டும் என வலியுறுத்தி வருகின்றன.

இந்நிலையில் இந்தப் பிரச்னையில் கவர்னர் பன்வாரிலால் புரோஹித்தின் பெயர் அடிபடுவதால் மத்தியில் உள்ள பி.ஜே.பி அரசு, அடுத்தகட்ட நடவடிக்கைகள் குறித்து தீவிர ஆலோசனையில் இறங்கி இருக்கிறது.

இதற்கிடையே நேற்று முன் தினம் கிண்டி கவர்னர் மாளிகையில் பத்திரிகையாளர்களை சந்தித்துப் பேட்டி கொடுத்த ஆளுநர் பன்வாரிலால் புரோஹித், ``என் மீதான குற்றச்சாட்டுகள் அடிப்படை ஆதாரமற்றவை. பேரன், கொள்ளுப்பேரன்களை எடுத்துவிட்டேன். எனக்கு 78 வயது ஆகிறது. ஆர்.சந்தானம் கமிட்டி விசாரணை அறிக்கையை ஏப்ரல் 30-ம் தேதிக்குள் சமர்ப்பிக்க உத்தரவிடப்பட்டுள்ளது. விசாரணை முடிவில் கடும் நடவடிக்கை எடுக்கப்படும்'' என்றார். மேலும், நிருபர்களின் பல்வேறு கேள்விகளுக்கு மழுப்பலாகவே பதில் சொன்னார் பன்வாரிலால் புரோஹித். ``பெண்கள் சம்பந்தப்பட்ட பிரச்னை; இதில் தொடர்புடையவர்களும் பெண்கள்; எனவே, பெண் அதிகாரி தலைமையில் விசாரணை கமிட்டி அமைப்பதுதானே சரியாக இருக்கும். இதுபற்றி உச்ச நீதிமன்ற உத்தரவுகள் உள்ளதே?" என்று நிருபர்கள் கேட்டதற்கு `ஐ.ஏ.எஸ். அதிகாரி சந்தானம், தேவைப்பட்டால் பெண் அதிகாரிகளை நியமித்துக்கொள்ளலாம்" என்று கவர்னர் பொதுவாக பதில் சொன்னார்.

``கவர்னராகிய உங்கள் மீது குற்றச்சாட்டு இருக்கும்போது, நீங்களே விசாரணைக் கமிட்டி அமைப்பது எந்த வகையில் நியாயம்? ஆர்.சந்தானம் கமிட்டி உங்களை விசாரிக்குமா?" என்று நிருபர்கள் கேள்வி எழுப்பினர். ``நீங்கள் (நிருபர்கள்) கூட என்னை விசாரிக்கலாம்" என்று பதில் சொன்னார் கவர்னர். இதையடுத்து இன்னோரு நிருபர், ``தனியார் கல்லூரி பேராசிரியையின் ஆடியோ உரையாடலுக்கு விசாரணை கமிட்டி அமைத்துள்ள நீங்கள், சென்னை பச்சையப்பன் கல்லூரி அறக்கட்டளை ஊழல் குறித்து விசாரிப்பீர்களா..?" என்று கேட்டதற்கு, ``அது கல்லூரி சம்பந்தப்பட்ட பிரச்னை" என்று மழுப்பலாகப் பதில் சொன்னார். ``நிர்மலா தேவி விவகாரத்தில் விசாரணை ஆணையத்தை நீங்கள் அமைத்தது ஏன்? அதை மாநில அரசுதானே செய்ய வேண்டும்" என்று கேட்டதற்கு, "வேந்தர் என்ற முறையில் விசாரணை ஆணையம் அமைக்க எனக்கு உரிமை உள்ளது" என்று கவர்னர் பதில் சொன்னார்.

`தமிழ்நாட்டில் காவிரிப் பிரச்னைக்காக, பிரதமர் சென்னை வந்தபோது போராட்டங்கள் உச்சகட்டத்தில் இருந்தபோதும், ஸ்டெர்லைட், நியூட்ரினோ, நெடுவாசல் போன்ற பிரச்னைகளின் போதெல்லாம் அமைதிகாத்த நீங்கள், இப்போது நிர்மலா தேவி பிரச்னையில் நிருபர்களை அழைத்து விளக்கம் கொடுப்பது ஏன்?" என்ற கேள்விக்கு, ``நிர்மலா தேவி பிரச்னைக்காக நான் பத்திரிகையாளர்களைச் சந்திக்கவில்லை. பொறுப்பேற்று 6 மாதம் முடிந்துவிட்டதால் உங்களைச் சந்தித்தேன். காவிரிப் பிரச்னை என் இதயத்தில் உள்ளது. உங்கள் எல்லா கேள்விகளுக்கும் பதில் அளித்துள்ளேன். மீண்டும் 6 மாதம் கழித்து உங்களை சந்திப்பேன்" என்று கவர்னர் சொன்ன பதில் நிருபர்களை மட்டுமல்ல, நேரலையில் பார்த்துக்கொண்டிருந்த பொதுமக்களையும் நகைப்புக்கு உள்ளாக்கியது. இப்படி முக்கிய கேள்விகளுக்கு நேரடியாகப் பதில் அளிக்காமல், மழுப்பலாக கவர்னர் கூறிய பதில்கள், இந்த விவகாரத்தில் மேலும் சந்தேகத்தை ஏற்படுத்தி இருக்கிறது. அதன் காரணமாகவே ``கவர்னரை திரும்பப்பெற வேண்டும்" என்று எதிர்க்கட்சிகள் குரல் கொடுக்கிறார்கள்.

தமிழக எதிர்க்கட்சிகளுக்கு இருக்கும் இந்த சந்தேகங்கள், மத்திய பி.ஜே.பி அரசுக்கும் ஏற்பட்டு இருக்கிறது. மத்திய உளவுத்துறை மூலம் இந்தப் பிரச்னை பற்றி விசாரித்து இருக்கிறார்கள். அந்த ரிப்போர்ட்டில் ``கவர்னரின் செயல்பாடுகள் திருப்திகரமாக இல்லை" என்று தெரிவிக்கப்பட்டுள்ளதாகக் கூறப்படுகிறது. மேலும், இந்தப் பிரச்னையில் தமிழக உளவுத்துறையின் உள்வேலைகள் இருப்பதாகவும் மத்திய உளவுத்துறை சந்தேகத்தைக் கிளப்பி இருக்கிறது. எனவே, இந்த கெட்டப்பெயரோடு பன்வாரிலாலை இனியும் தமிழகத்தில் வைத்துக்கொள்ள மத்திய அரசு விரும்பவில்லை என்கிறார்கள். மாவட்ட வாரியாக ஆய்வுப் பணிகள், துணைவேந்தர்கள் நியமனத்தில் தொடர் சர்ச்சை, இப்போது நிர்மலா தேவி பிரச்னை குறித்து விளக்கம் என்று பன்வாரிலாலின் செயல்பாடுகள் அடுத்தடுத்து சர்ச்சையை உருவாக்கிக் கொண்டு இருப்பதால் இனியும் அவரை தமிழ்நாடு கவர்னராக தொடர மத்திய அரசு விரும்பவில்லை என்கிறார்கள். எனவே, விரைவில் மேற்கொள்ளவிருக்கும் கவர்னர்கள் மாற்றத்தின்போது தமிழக கவர்னரையும் மாற்ற இருப்பதாக டெல்லி வட்டாரத்தில் சொல்கிறார்கள். எதுவானாலும் இன்று மத்திய அரசிடம் ஆளுநர் விளக்கம் அளித்த பிறகு மத்திய அரசு முடிவை அறிவிக்கும் என எதிர் பார்க்கப் படுகிறது.

 

Search!

தற்போது வாசிக்கப்படுபவை!