மகனைக் கொன்றதாக பிரபல எழுத்தாளர் கைது!

மே 10, 2018

மதுரை (10 மே 2018): மகனைக் கொன்ற வழக்கில் பிரபல எழுத்தாளர் செளபா என்கிற சௌந்திரபாண்டியன் கைது செய்யப் பட்டுள்ளார்.

சௌபாவின் மனைவி லதா பூரணம் கோவில்பட்டி கல்லூரியொன்றில் முதல்வராகப் பணியாற்றி வருகிறார். கணவருடன் ஏற்பட்ட கருத்து வேறுபாட்டால் பிரிந்து வாழ்ந்து வருகிறார். இவர்களின் ஒரே மகனான விபின் சென்னையிலுள்ள கல்லூரி ஒன்றில் முதுகலைப் படிப்பு முடித்துள்ளார். எங்கும் வேலை செய்யவில்லை. தந்தை அல்லது தாயுடன் மாறி மாறி வசித்து வந்துள்ளார். பெற்றோரிடம் அடிக்கடி பணம் கேட்பது, நண்பர்களுடன் எங்கேனும் சுற்றிக்கொண்டே இருப்பது என இருந்திருக்கிறார்.

இந்நிலையில், சில நாள்களாக லதாவை விபின் சந்திக்க வரவில்லை. அதனால் செளபாவிடம் ’விபின் எங்கே?’ என்று விசாரித்திருக்கிறார் லதா. தனக்குத் தெரியாது என்று கூறியுள்ளார் செளபா. பல இடங்களிலும் தேடிக் கிடைக்காததால், ’மகனைக் காணவில்லை. என் கணவர் மீது சந்தேகமாக உள்ளது' என்று லதா கடந்த 5-ம் தேதி மதுரை எஸ்.எஸ்.காலனி போலீஸில் புகார் கொடுத்திருக்கிறார். விசாரிக்கத் தொடங்கிய போலீஸார் நேற்று காலை சௌபாவை விசாரணைக்கு அழைத்துள்ளனர். ’மகனைப்பற்றி எனக்கு எதுவும் தெரியாது’ என்று முதலில் கூறியவர், பின்பு போதை அடிமைகள் மறுவாழ்வு மையத்தில் விபினைச் சேர்த்ததாகக் கூறியுள்ளார்.

இதனால் அவர் மீது சந்தேகம் உண்டாகியிருக்கிறது. விபினின் செல்போனை சௌபா வீட்டில் கைப்பற்றிய போலீஸ், சௌபாவிடம் அது தொடர்பாக இறுக்கமான விசாரணை மேற்கொண்டனர். ``தினமும் குடித்துவிட்டு தகராறு செய்ததால், ஆத்திரத்தில் அவனைக் கம்பியால் அடித்தேன். அடிபட்டதில் இறந்து விட்டான். யாருக்கும் தெரியாமல் உடலை கொடை ரோட்டில் இருக்கும் என் தோட்டத்தில் எரித்துவிட்டேன்" என்று செளபா கூறியதாகத் தெரிவிக்கின்றனர் போலீஸார். செளபா கொடுத்த வாக்குமூலத்தின் அடிப்படையில் அவருடைய தோட்டத்தில் வேலை செய்த இருவரையும் கைது செய்துள்ளனராம். விரைவில் செளபாவை தோட்டத்துக்கு அழைத்துச் சென்று சம்பவம் தொடர்பாக விசாரணை நடத்தவுள்ளது போலீஸ்.

Search!

தற்போது வாசிக்கப்படுபவை!