மும்பை (07 ஜூலை 2021): பாலிவுட்டின் மூத்த நடிகர் திலீப் குமார் (யூசுப் கான்) (98) மும்பையில் உள்ள இந்துஜா மருத்துவமனையில் காலமானார்.
அவர் கடந்த புதன்கிழமை மூச்சுத் திணறல் காரணமாக மருத்துவமனையில் அனுமதிக்கப்பட்டார். ஒரே மாதத்தில் அவர் மருத்துவமனையில் அனுமதிக்கப்பட்டதில், இது இரண்டாவது முறையாகும்.
திலீப் குமார் கடந்த சில ஆண்டுகளாக சிறுநீரக நோய் முதல் நிமோனியா வரை பல நோய்களுக்காக மருத்துவமனையில் அனுமதிக்கப்பட்டிருந்தார். சில ஆண்டுகளுக்கு முன்பு, தனது 94-வது பிறந்தநாளை காய்ச்சல் மற்றும் கால் வீங்கியதால் சிகிச்சை பெற்று வந்த மருத்துவமனையிலேயே கொண்டாடினார். டிசம்பரில் 99-வது பிறந்தநாளை கொண்டாடவிருந்த நிலையில் இன்று காலை 7.30 மணிக்கு காலமானார். 50 வருடங்களுக்கும் மேலாக தனது மனைவி சைரா பானுவுடன் வசித்து வந்தார்.
இவர் முகலாய இ-அசாம், தேவதாஸ், ராம் அவுர் ஷியாம், அந்தாஸ், மதுமதி மற்றும் கங்கா ஜமுனா உள்ளிட்ட இந்திய சினிமாவின் மிகச் சிறந்த ஐகானிக் படங்களில் நடித்துள்ளது குறிப்பிடத்தக்கது.