லக்னோ (13 மார்ச் 2022): நடந்து முடிந்த உத்தரப்பிரதேச சட்டமன்றத் தேர்தலில் குறைந்தது எட்டு சதவீத முஸ்லிம் வாக்குகளைப் பெறுவதில் பாஜக வெற்றி பெற்றுள்ளது.
முஸ்லிம்கள் எதிராக வாக்களிக்கிறார்கள் என்ற பொதுவான கருத்து இருந்தபோதிலும் இது ஆச்சரியத்தை ஏற்படுத்தியுள்ளது.
CSDS-லோக்நிதி வெளியிட்டுள்ள ஆய்வறிக்கையில் 20 சதவீத முஸ்லிம் வாக்குகளில் சமாஜ்வாடி கட்சி சுமார் 79 சதவீத வாக்குகளைப் பெற்றுள்ளது என்றும், குறைந்தது 8 சதவீத வாக்குகள் பாஜகவுக்கு கிடைத்துள்ளது எனவும், இது 2017ஆம் ஆண்டை விட ஒரு சதவீதம் அதிகமாகும் எனவும் CSDS-லோக்நிதி தனது ஆய்வறிக்கையில் தெரிவித்துள்ளது.
உத்தரப்பிரதேசத்தில் கடந்த 5 ஆண்டுகளில் பல்வேறு நலத் திட்டங்களால் இந்துக்களுக்கு நிகரான பலன்களை முஸ்லிம்களும் பெற்றிருப்பதுதான் முஸ்லிம் வாக்குகள் பாஜக பக்கம் மாறுவதற்கு முக்கியக் காரணமாக கூறப்படுகிறது.
முஸ்லிம்கள் பா.ஜ.க.வுக்கு ஆதரவளிப்பதற்கான சாத்தியக்கூறுகளை ஆராய வேண்டும் என்றும் அந்த ஆய்வு தெரிவிக்கிறது. அதேவேளை “தலித்துகளை விட முஸ்லீம் சமூகத்தின் நிலை மோசமாக உள்ளது” என்று சச்சார் கமிட்டி அறிக்கையில் குறிப்பிட்டிருப்பதும் கவனிக்கத்தக்கது.
